வாழ்த்துக்கள்


கவிஞர் இதயதாசன்
அண்ணா திடாவிட முன்னேற்றக் கழகம்
துணை செயலாளர், மாவட்ட இலக்கிய அணி
24/19, ஜடையினா ஹாஜியார் தெரு, புலவர் கோட்டை,
செல்லிடை: 9486601182/ 04365-251716
நாகூர் – 611002

அன்பின் நண்ப ..

அறிவுடை கவிஞா
அந்த நாள் ஞாபகம்
அப்துல் கையூம்
ஆக்கிய பொங்கலை
அள்ளியும் உண்டேன்.

அசையா தமர்ந்து
அனைத்தையும் சுவைத்தேன்
எண்ணக் குவியலில் இருந்ததைக் கொஞ்சம்
வண்ண வார்த்தையால்
வருணித்தீரே …!

வழக்குச் சொல்லை,
வசைமொழிக் கூற்றை
கணக்காய்ச் சமைத்து
பந்தியும் இட்டீர் ..!

திரைக்கடல் தாண்டியும்
திருத் தமிழ்ப்பணியை
நுரைப் பூவாக்கி
நுகரவும் வைத்தீர்
நவீன
‘கட்ட பொம்மனே’ !

தமிழை மறந்த
தமிழர் சபையில்
அமிழ்தம் தமிழை
அளவே செய்தீர் !

தங்கக் கடையில்
சங்கத்தமிழை;
பாலை மண்ணில்
பதியம் போட்டீர்…!

நீ
வாழிய வாழியவே !

என்றும் நிறைவுடன்
இதய தாசன்
20.08.07

Advertisements

நூலாசிரியர் அறிமுகம்

nizam-passport.jpg

 M.G.K. NIZAMUDDIN Ex.MLA  (Nagappattinam Constituency)

  •  கவிஞர் அப்துல் கையூம் கடந்த 29 வருடங்களாக பஹ்ரைனில் வசித்து வருபவர்.

  • தன் நகைச்சுவை பேச்சாலும், எழுத்துக்களாலும் தனக்கென ஒரு பாணியைக் கையாள்பவர்

  • நல்ல படைப்பாளி.  பற்பல நாடகங்களை பஹ்ரைனில் தொடர்ந்து அரங்கேற்றியிருக்கிறார்.

  • கவியரங்குகளிலும், பட்டிமன்றத்திலும் தனக்கென ஒரு முத்திரை பதித்தவர்.

  • பஹ்ரைனில் தமிழ்ச் சமுதாயத்திற்கென ஒரு அமைப்பை உருவாக்குவதற்கு மூலக் காரணமாக இருந்தவர்.

  • பள்ளிப் பருவத்திலிருந்தே தமிழ் மொழியின் மீது தீராத பற்றுக் கொண்டவர். இவரது கவிதைகள் பல்வேறு பத்திரிக்கைகளில் வெளிவந்துள்ளது.

  • “போன்சாய்”. “அந்த நாள் ஞாபகம்”  போன்ற கவிதை  நூல்கள் வெளியிட்டிருக்கிறார். 

– எம். ஜி.கே. நிஜாமுதீன்

L.L.B. D.G.  Ex. MLA

அந்த நாள் ஞாபகம் – ஒரு கண்ணோட்டம்

babu-chicha2.jpg

“அந்த நாள் ஞாபகம்” – இது நாகூரை பற்றி, நாகூர் மக்களுக்காக, நாகூரான் ஒருவனால் நெய்யப்பட்ட பட்டாடை.  இதிலுள்ளவை நாகூரில் வாழ்ந்த, வாழும் அனைவருக்கும் தெரியும். ஆனால் உன் வண்டல் மண் மனது தான் நாகூரின் வரலாற்று விதைகளை விருட்சம் ஆக்கியிருக்கிறது.  

நீ சொல்லிய அனைத்தும், நீ சொல்ல மறந்த தூய தமிழ்ச்சொல்லாம் “மறுசோறு”, சுவையான தாளுச்சா, எங்கும் காணமுடியாத “சீனிதுவையல்” , அதுவும் வாழைப்பழமும், புலவு சோறும் சேர்ந்து சஹானில் உருவாகும் “பஞ்சாமிர்தக்குளம்”, அதை நால்வர் பங்கு போட்டுக் கொள்ளும் பாங்கு, அரை அடி விட்டமுள்ள “ஜாங்கிரி”, ஆட்டோமொபைல் வாகனங்களுக்கு அறுவை சிகிச்சை செய்யும் ஆஸாத், யூசுப் – பட்டரைகள்.  யாசகம் கேட்டுக் வருபவர்களிடம் கூட மாஃப் செய்யுங்கள் (மன்னியுங்கள்) என்று மரியாதை செய்யும் பண்பு அத்தனையும் ‘பிளாஷ்பேக்” ஆக “ஞாபகம் வருதே”.

உன் எழுத்தில் அழகும் உண்டு. “வெள்ளியிலே தகடு செய்து ஏய்ப்போர்” என்று கூறும் தைரியமும் உண்டு.

நாகூர் மண்ணை சுவைத்து பின் அசைபோட்டு ரசிக்கும் நீதான் நாகூரின் மண்ணின் மைந்தன். நீ மலராகி மணம் வீசும் போது மற்றவர்கள் ரசிக்கிறார்கள். நீ கிரெசன்ட் பள்ளியில் மொட்டாக இருக்கும்போதே  நான் ரசித்தேன். நீ முளையிலேயே தெரியும் விளையும் பயிர்.

உன்னை கவிஞர்கள், நண்பர்கள்,  நீ அடையாளம் காட்டிய அனைவரும் பாராட்டுகிறார்கள்  ஆனால் உன் ஒவ்வோர் அசைவிலும் ஆனந்தம் கண்ட உன் பாட்டி – என் தாயார் – உன்னைப் பார்த்து மகிழ, பாராட்ட இல்லாதது உன் துரதிஷ்டமே …! 

என்ன..  உன் கண்ணீர் கன்னத்தில் உருண்டோடி வாய்க்குள் விழுந்து இனிக்கிறதா ..? அது பாசத்தின் கண்ணீர். இனிக்கத்தான் செய்யும். எனக்கும் அது இனிக்கிரது.. இதை எழுதும் போது.

டாக்டர் அ.அப்துல் ரஜாக்

பெருந்துறை – 17.07.2007

போன்சாய் – டாக்டர் அப்துல் ரஜாக்

babu-chicha.jpg  
“போன்சாய்” கவிஞனுக்கு …  
உன் குட்டிக் கவிதைகளை படுக்கையில் சாய்ந்து படிக்க ஆரம்பித்தேன். “தலைப்பின்றியே போகட்டும் என் கவிதை” என்றாய். இது முதல் பக்கத்திலேயே உன் முகவரி காட்டும் “நெத்தியடி”. படுக்கையில் நிமிர்ந்து உட்கார்ந்தேன்; “போன்சாய்” படித்து முடிக்கும் வரை.  உன் தமிழ் ஆர்வம் எனக்குத் தெரியும். அது நீரு பூத்த  நெருப்பு என்று அறிந்தேன். உன் கவிதைகள் அனைத்தும் தேன் துளிகள் . அதில் நான் அதிகம் சுவைத்தவை : 
  • டை – அசால்டாய் தொங்கும் ஆங்கில கோவணம்
  • கொடியும் குண்டூசியுமாய் குத்த இடம் தேடும் வெற்று மேனிச் சிறுவன்
  • இந்தியத் தாய்க்கு கல்லறை எழுப்பிவிட்ட கற்களை சுமந்து வந்த கர சேவகர்கள்
  • புதியதொரு நிறமொன்றை கண்டு பிடியுங்கள்  – புதிய கட்சி தொடங்க
  • கல்யாண வீடுகளில் காலணிகளின் கூட்டணி மாநாடு
  • தலைமேட்டில் மைல்கல் – ஓடிய காலத்து மைலேஜ் கணக்கு
  • சிலந்தி வலை பற்றிய வருணனை
  • சத்துணவு ஆயாவின் சொத்தைப்பிள்ளை
  • கண்ணாடிக் கல்லறை  – இன்னும் எவ்வளவோ .. ..
அது சரி. முண்டாசுக் கவிஞனின் மீசையைப் பார்த்துமா உனக்கு மீசை மேல் வெறுப்பு..?  மீசையா முத்தத்தின் எதிரி..? மீசை செய்யும் குறும்பின் சுவையை நீ அறியமாட்டாய்.  உன் கிறுக்கல்கள் இதய ‘ஈ.ஸி.ஜி.’ மட்டுமல்ல. உன் இதய ‘எக்கோ’  மற்றும் ‘ஆஞ்சியோகிராமும்’ அதுதான். நீ ஆரிப் நாவலரின் அடுத்த வீட்டுக்காரன் என்பது நிரூபணம்.  28 – ஆண்டுகள் பஹ்ரைனில் புதைத்து வைத்த உன் எண்ணங்கள் என்ற கரித்துண்டுகள் “போன்சாய்” வைரங்களாய் மாறியதோ..?
– டாக்டர் அ.அப்துல் ரஜாக்
பெருந்துறை – 17.07.2007

 

டாக்டர் அப்துல் ரஜாக்கின் ஒரு சில கவிதைகள் :

ஆளுயர  கட்-அவுட் 
அர்ச்சனை
ஆராதனை
அபிஷேகம்
          நடிகருக்கு பிறந்த நாள் இன்று
          நாட்டிற்கு விமோசனம் என்று ?
_____________________________________________________________
அன்பளிப்பு
மாமூல்
சம்திங்
ரேட்
          காரியங்களை கை கூட வைக்கும்
          கரன்சியின் புனைப்பெயர்கள்
____________________________________________________________
கருப்புப் பணம்
மஞ்சள் பத்திரிக்கை
பச்சையான வசனம்
நீலப்படம்
சிவப்பு விளக்குப் பகுதி
          பிஞ்சிலே பழுத்த மாணவன்
          சொன்ன நிறங்களின் உதாரணம்
___________________________________________________________
ஆசையுடன் அழைத்தேன்
அருகில் வரவில்லை
கோபத்துடன் கூப்பிட்டேன் – அவள்
குணம் மாறவில்லை
அடித்தும் பார்த்து விட்டேன்
அலட்சியம் செய்கிறாள்
ஆனால்
விசிலடித்தது குக்கர்
விரைந்து ஓடுகிறாள்
என் மனைவி
____________________________________________________________
கழுத்திலே சுறுக்கு
கால்களில் கணம்
முதுகிலே மூட்டை
மூளையிலே பாடங்கள்
          ஆட்டோவில் திணிக்கப்பட்டு
          அல்லல்பட்டு அவதிப்பட்டு
          ஊர்சுற்றி உடல்சோர்ந்து
அப்பாடா ! தரையிறங்கி விட்டாள்
எங்கள் வீட்டு சுனிதா வில்லியம்ஸ்
 ___________________________________________________________
ஆங்கிலத்தேதி தமிழ்த்தேதி
அமிர்தயோகம் அஷ்டமி
ராகுகாலம் ராசிபலன்
நல்லநாள் நகசு
அத்தனையும் காட்டுகிறேன்
          கருணையின்றி கிழிக்கிறாயே தினம்
          காலண்டர் என்று
___________________________________________________________
டாக்டர்தான் ஆக வேண்டும் – அம்மா
இஞ்ஞினியர் என் ஆசை – அப்பா
கலெக்டர்தான் என் கனவு – அக்கா
வக்கீல் ஆனால் என்ன ? – தம்பி
          எல்லோரையும் திருப்திபடுத்த
          நான் நடிகனாகி விட்டேன்
_____________________________________________________________
பகல் முழுதும் உழைப்பு
பிளாட்பாரத்தில் படுக்கை
அருகிலே ஆரணங்கு
அழகான என் குழந்தை
நிம்மதியான நித்திரை
நாளைக்கு என்ன நடக்கும்?
நானறியேன். ஆனாலும்
கடவுளை வேண்டினேன் – நான்
பணக்காரன் ஆக வேண்டாம்
தூக்கமில்லாமல் புரளும்
துன்பம் வேண்டாம்
நாடி நரம்புகளை வருத்தும்
நோய்கள் வேண்டாம்
பணத்திற்காக சிரிக்கும்
பந்தம் வேண்டாம்
பாசமே இல்லாத
பிள்ளைகள் வேண்டாம்
ஏழையாய் வாழவே
ஏங்குகிறேன் இறைவா
ஏழையாய் சாகவே
வேண்டுகிறேன் நானும் !
____________________________________________________________

நாகூர் ரூமி

rumi_kunkumam1_thumbnail1.jpg

நாகூர் ரூமி

வில்லியம்ஸ் வொர்ட்ஸ்வொர்த்தைப் போல ‘அமைதியாக நினைத்துப் பார்த்து’ – Recollections  in tranquility – நாகூருக்கு எழுத்தில் உயிர் கொடுத்திருக்கிறார்.

நாகூரைப் பற்றித் தெரிந்துக் கொள்ள விரும்புபவர்களும், நாகூர்க்காரர்களும் இதை சுவையுடன் ரசிக்கலாம்.

தெரியாதவர்களுக்கு இது தகவல் களஞ்சியம். தெரிந்தவர்களுக்கு இது நேயர் விருப்ப மறு ஒளிபரப்பு.

எனக்கு ஒரு ஆச்சரியம். இவ்வளவு விரிவாகவும், இவ்வளவு சுருக்கமாகவும், இவ்வளவு எளிமையாகவும் எழுத முடியுமா? முடியும் என்று கையூம் நிரூபித்திருக்கிறார். மனசாட்சி உள்ள எந்த எழுத்தாளரும் இவரை மனதாரப் பாராட்டியே ஆக வேண்டும்.

நாகூர் ரூமி

 

கவிஞர் ஷபி

போன்சாய் – ஒரு பார்வை

போன்சாய்.. ..                                                     
உளியை ஓரங்கட்டி
ஊசியினாலேயே                                               
உருவாகிய சிலை

            

பார்த்துவிட்டு                                                  
போட்டுவிட                                                      
பாக்கெட் நாவலா..?

 

“அசைபோட்டுப்                                            
பார்க்கிறேன்”     
                                               
மனதோடு                                                        
மல்யுத்தம் நடத்தும்                                             
வரிகளை                                                           
மீண்டும் மீண்டும்
அசை போட்டு                                             
பார்க்கிறேன்         
                                                
“தலைப்பின்றியே போகட்டும்                                         
என் கவிதை”                                          
கவிஞனுக்கேயுள்ள கர்வம்                                 
தன்னம்பிக்கையாய்

 

“உலகச் சந்தையில்                                             
இந்தியத் தோல்”                                                      
தாய் நாட்டைத் துறந்து                                            
வெளிநாட்டு மோகத்தில்                                     
அடிமையாகும்                                                      
சுதந்திர புருஷர்களுக்கு                                               
ஒரு குட்டு

 

“தாமரை இலை”                                                 
சாபமாய்ப் போன உறவு.                                         
பேதைப் பெண்களின்                                           
முரண்பாடு

 

“ஏவுகணை ஏலம்”                                                  
புத்தன் – காந்தியின்                                       
அஹிம்சையை                                                 
போதிக்கும்                                                      
தீவிரவாதி

 

“தேடலில்லா வாழ்க்கை                                           
தேறாத வாழ்க்கை”                                        
சிந்திக்காதவன்                                                 
வாழ்க்கை                                               
நிந்திக்கத்தக்கது                                                   
தீர்க்க தரிசனம்

 

“வரவேற்பறையில்                                                
கண்ணாடி கல்லறை”                                      
உயிரினங்களை                                          
கூண்டிலடைத்து                                             
ஆனந்தமடையும் மனிதன்                                              
அவன் தரும் பரிசு                                          
சித்திரவதை.

 

மைதாஸே..!                                                        
ஜன்னல் சிறைதனிலே                                        
வரதட்சணை ஓலம்                                                  
பாவம் முதிர்க்கன்னிகள்

 

“புதியதொரு நிறத்தைக்                                           
கண்டு பிடியுங்கள்”                                                 
வண்ண விளம்பரத்தால்                                
அரசியல்வாதிகளின் ஏலம்

 

“அழத்தொடங்கி”                                             
அழுகையை                                                
கேடயமாக்கும்
காரியவாதிகளுக்கு                                             
வாழ்க்கை உபதேசம்                                              
தத்துவ ஞானம்

 

படிமப் பாதையில்                                                    
தடம் புரளா                                                  
புதுக்கவிதை                                                         
பெட்டகம்

 

மனதோடு                                                        
மல்யுத்தம் நடத்தும்                                                                
வரிகளை                                                             
அசை போட்டுப்                                             
பார்க்கிறேன்

 

பாக்கெட் நாவலா                                                   
பார்த்துவிட்டு                                                      
போட்டு விட ?

 

வாசகனாய்                                                            
வலம் வந்தபோது                                              
இதயத்தில்                                                                
சிம்மாசனமிட்ட                                              
உணர்வுகளை                                                    
பரிமாறும்

 

அன்பன்                                                             
கவிஞர் ஷபி

டாக்டர் கவிக்கோ அப்துல் ரகுமான்

scan00013.jpg

போன்சாய்

வாழ்த்துரை

இதய ஈஸிஜி

சிறிதுதான்
உண்மையில்பெரிது.

கடுகு சிறிது;
காரம் பெரிது.

குறள் சிறிது;
பெருமை பெரிது.

வாமனன் குள்ளன்;
ஆனால்அவன்
மூவடிகளால்
மூவுலகையும் அளந்தான்.

பெரிய மரங்களை –
வேர்களை வெட்டியும்
கிளைகளைக் கட்டியும்
சிறிதாக்கி வளர்ப்பது
போன்சாய் கலை.

இந்தக் கலையில் வல்ல
ஜப்பானியன்தான்
வாமனன் போன்று
மூவடிகளால் ஆன
‘ஹைக்கூ’ வை அளித்தது.

இது அவசர யுகம்;
அவசர உணவு;
அவசரப் பயணம்;
எல்லாம் அவசரம்.

நீண்ட கவிதைகளை
நிதானமாகப் படிக்க
நேரமில்லை.

இதை உணர்ந்த
கவிஞர் அப்துல் கையூம்
‘போன்சாய்’ கவிதைகளைப்
படைத்துள்ளார்.
இக்கவிதைகள்
போன்சாய் மரங்களைப் போல
சிறியனவாக இருந்தாலும்
பெரிய கருத்துக்களைப்
பேசுகின்றன.

“இந்தக் கிறுக்கல்கள்
என் இதய ஈஸிஜி” என்கிறார்.

இந்த ஈஸிஜி கிறுக்கல்
அவருடைய
இதய ஓட்டத்தை மட்டுமல்ல
நாட்டின் நோய்களையும்
காட்டுவதாக இருக்கிறது.

அப்துல் ரகுமான்
23.03.06

கவிக்கோ அப்துல் ரகுமானைப் பாராட்டி சில வார்த்தைகள் :

 karunanidhi.jpg

“வெற்றி பல கண்டு நான்

விருது பெற வரும் போது

வெகுமானம் என்ன

வேண்டும் எனக் கேட்டால்

அப்துல்

ரகுமானைத் தருக என்பேன்”

(முத்தமிழ் அறிஞர் டாக்டர் கலைஞர்)

imagescag912od.jpg

“நான் கலீல் ஜிப்ரானைப் படிக்கும் போதெல்லாம் ‘தமிழில் இப்படி எழுத யாருமில்லையே’ என்று ஏங்குவேன். அந்த ஏக்கம் இப்போது இல்லை. இதோ, அப்துல் ரகுமான் வந்து விட்டார். இவருடைய கவிதைகளை ஆங்கிலத்தில் மொழி பெயர்த்து வெளியிட்டால், ‘யார் இந்தக் கவிஞன்?’ என்று உலகம் விசாரிக்கும்.”

கவியரசு கண்ணதாசன்